O Mapa das Illas

Dentro da proposta Arte en Tránsito nas escolas para o CEIP de Chancelas (Poio, Pontevedra) xurde a colaboración coa artista Branca Novoneyra (Lugo, 1976) e a súa creación do xogo educativo O Mapa das Illas. 

A bailarina e coreógrafa explica así o obxectivo do xogo: “O Mapa das Illas é un xogo corporal baseado nas achegas da danza educativa i especialmente deseñado para dialogar co espazo no que se contextualiza. A intervención consistirá en habitar dito espazo cunha instalación asociada á educación artística.../...os alumnos de infantil e primaria poderán vivencialo nas clases de música e movemento, educación física e tamén nos recreos.”

As ilustracións dos espazos son obra da artista plástica Paulova (Lugo, 1983), quen a partir da proposta de Branca Novoneyra, baseouse nos gustos da súa infancia e en como lle gustaría que fose o seu propio colexio para así plasmalos nesta obra. 

Neste enlace ao blog do xogo pódense atopar as súas instrucións, características e influencias ademais de información sobre as creadoras.

26 de abril de 1937

Hoxe cumplense 75 anos do bombardeo a Guernica. O 26 de abril de 1937, esta poboación vasca foi bombardeada pola Lexión Cóndor alemana e a Aviación Lexionaria italiana durante o transcurso da Guerra Civil española.

O cadro de Picasso, do mesmo nome, foi un encargo do goberno da II República para a Exposición Internacional de París de 1937. O pintor malageño pintaba a arte e a súa beleza ideal pero nesta obra quixo ir un pouco máis lonxe e pintou a destrucción. Esta obra non ten un único significado, cada persoa pode darlle un propio, pero hoxe en día considérase ao Guernica un símbolo do antibelicismo e dos horrores da guerra.

Como comemoración a este aniversario queremos compartir con vós o libro Un cadro de Picasso de Claire D'Harcourt (Ed. Faktoria K de Libros, Kalandraka). Este fermoso libro pode ser unha práctica ferramenta para traballar co alumnado tanto o tema da guerra como o coñecemento do artista e o estilo cubista.
Desde un punto de vista máis técnico favorece a comprensión da expresividade das pinceladas e os trazos, así como as características plásticas do conxunto da obra: textura, cores, simbolismo das figuras, composición...

CEIP Chancelas

Neste curso académico iniciamos as sesións de formación do profesorado sobre arte contemporánea como parte do proxecto Arte en Tránsito nas escolas que se está a desenvolver no CEIP de Chancelas (Poio, Pontevedra). O obxectivo principal deste proxecto é que os nenos teña unha experiencia artística, fóra dos espazos tradicionalmente dedicados á arte, coa que se decaten que a través da arte poden cambiar o seu entorno e melloralo. Para esta labor contamos coa colaboración das artistas Mónica Alonso e Branca Novoneyra que realizarán dúas obras para este centro.

As sesións de formación do profesorado levaranse a cabo ao longo do curso co obxectivo de que os mestres poidan poñer en práctica nas súas aulas os recursos traballados previamente en relación coa arte contemporánea.

O proxecto está apoiado polo CEFORE de Pontevedra, o grupo Froiz e a ANPA do centro.

Principios e fins

Xerar experiencias artísticas
Mediar entre artistas contemporáneos e a cidadanía
Promover inquietudes no ámbito dos estudos visuais
Facilitar recursos para o achegamento as linguaxes artísticas contemporáneas

Presentación do equipo

Arte en Tránsito está constituído por profesionais do mundo da arte e con experiencia no campo da educación e dos departamentos didácticos de museos e institucións culturais. Ana Baamonde, Blanca Bermúdez, María Díaz, Isabel Gómez e Ana Rodríguez son licenciadas en Belas Artes e Historia da Arte e mestradas en Arte, Museoloxía e Crítica Contemporáneas.

Desde os finais do ano 2010 iniciáronse as formulacións sobre a necesidade de aproximar as manifestacións artísticas contemporáneas ao conxunto da sociedade, especialmente a todos aqueles colectivos que doutro xeito teñen moi escasas posibilidades de coñecer as últimas tendencias a nivel cultural.

Así comeza o presente proxecto, Arte en Tránsito nas escolas, que propón sacar a arte contemporánea dos museos, institucións e galerías de arte para trasladalo a distintos centros educativos, especialmente a aqueles máis afastados dos principais núcleos nos que se presenta habitualmente a arte contemporánea en Galicia: Santiago de Compostela e Vigo, xa que consideramos que todos os nenos teñen que ter a oportunidade de coñecer as manifestacións culturais actuais.

Punto de partida

A cultura visual ten unha grande importancia dende os primeiros anos de vida, xa que o universo visual ten un forte poder persuasivo, englobando aspectos como a conciencia cultural, a experimentación do pracer e a capacidade de socialización. Ademais, as prácticas artísticas axudan a construír a personalidade e serven como motor social, pola capacidade de transformación e de xerar novas formas de ver e coñecer o mundo e entender o propio ámbito.

Dentro do universo artístico, é importante que os nenos coñezan as grandes obras da Historia da Arte e que sexan introducidos no coñecemento dos clásicos, pero non menos importante é o contacto coas manifestacións artísticas contemporáneas, que deben formar parte das estruturas de referencia que o neno manexe para a comprensión das formas visuais ás que teña que enfrontarse ao longo da súa vida.

Por outro lado, as prácticas artísticas contemporáneas baséanse na posibilidade de experimentación, na intervención sobre o espacio e na utilización dun recurso tan próximo como é o propio corpo, polo que a inmersión nestas prácticas proporciona aos pequenos un amplo abano de posibilidades ata o momento inimaxinadas.

Comezamos

Benvidos aos interesados nas novas formas de compartir a Arte contemporánea.
Bienvenidos a los interesados en las nuevas formas de compartir el Arte contemporáneo.